Dear Eve,

إيف العزيزة،

انا بديت رسالتي بعبارة "إيف العزيزة،" وبعرف انها ممكن تكون بداية لأية رسالة، بس انا بحب هي البداية كتير، بحبها لأنها بتطلع بشكل طبيعي وبدون تفكير، لأنه لو كنت راح فكر بشو لازم ابدا رسالتي كنت يمكن ما بديت هالرسالة واللي كان لازم اكتبها، وما بعرف ليش عم اكتبها، يمكن احساس غريب أصابني لما قريت اليوم توقف الأوراق عن السقوط، لأ، كلمة "غريب" مش راح تقدر توصف احساسي، يمكن كلمة غصة بتعبر اكتر، أو كلمة دمعة كبرت كتير ومستحية تنزل،

إيف، يمكن عم أكتبلك وأنا مابعرف شو اسمك الحقيقي ، بس اللي متأكد منه إنه لو طلبوا مني اعطيكي اسم تاني ما راح يكون غير اسم إيف، إيف الانسانة، ومين ممكن يحمل اسم إيف غير انسانة بسيطة وواضحة، وبنفس الوقت غامضة، صريحة وما بتسكت على شي، بس بنفس الوقت بتفضل الصمت على الكلام، انسانة قوية متينة، بس بجواتها طفلة صغيرة ما عمتكبر،

يا إيف، واللي ما بعرف ليش عم اكتبلك، يمكن عم اكتب لإيف اللي حركت بجواتي حب للكتابة كان مات من سنين، او لإيف اللي كانت تكتب بلسان كل الناس وكأنها بجواتهم،

اليوم وأنا عم اسمع صوتك عميصرخ ويقول: "راح توقف الأوراق عن السقوط" ، قررت أكتبلك وانا عم قول لحالي مش هم الأوراق، سقطت أو توقفت عن السقوط، الشجرة هي الأصل، الشجرة هي اللي جذورها ممتدة بالأرض، وانا بعرف انه إيف شجرة، وبقدر قول انها شجرة أرز، ايه، مين ممكن يكون شجرة أرز أكتر من إيف بنت بلد شجر الأرز عنوانه،

إيف، مش هم الأوراق، الهم انتي، ايه، يمكن بلشت اعرف ليش عم اكتبلك، يمكن لأنه بدي اتطمن عليكي، يمكن لأنه طالما إيف بخير فالدنيا بألف خير!!



أعذري رسالتي، لأني مش راح عيد قرائتها ونقحها لأني كتبتها بدون تفكير، ولأنه لو فكرت ما كنت كتبتها، و لو نقحتها، يمكن ما ابعتها، منشان هيك راح ابعتها متل ماهي،

Iron Mask